Leyndó

Stoltur birtist hann í dyrunum með andlit alsett stóru brosi og kallaði "mamma".

Um hugann flugu sem snöggvast minningar tengdar fótbolta og prakkarastrikum. 

Lyktin hafði breyst úr súkkulaði-kanil blöndu yfir í adidas-sport og Diesel.  Legókubbum og playmo var skipt út fyrir snyrtitösku með rakvél og rollon.  Íþróttagallinn sem fór í þvott daglega vék fyrir skyrtum, peysum, bolum, buxum, buxum og fleiri buxum.

Hann taldi sig orðinn mann um leið og hann sagði mér leyndarmál sitt.

Í huga móður er hann þó enn bara ljúfur lítill drengur.

                                                                           

Huggun

Er sortnaði von tóku tárin að streyma.

Þá birtist hún hljómfögur, faðmaði mig og kyssti.

Kenndi móður allt það er sú hafði áður kennt henni.

Nú, bara helmingi betur.

                                                                         

Nánd

Rökkur tók við af degi er litlar hendur köstuðu mjúkum snjónum.

Inn á milli frostrósa glitruðu hnetubrún augu af hamingju augnabliksins.  Mótuðust af brosandi vörum sem þurftu engu við að bæta.

Skilaboðin voru skýr og bárust beint í hjartastað.

Engin orð fá þeim lýst.